Margir frægir leikarar telja sig vera meira en bara leikarar og hafa sumir þeirra reynt fyrir sér í tónlist, með misgóðum árangri. Flestir þeirra geta kannski sungið ágætlega en færri kunna þó að semja góða tónlist, eða hafa skrítinn smekk fyrir lagavali. Hér ætlum við aðeins að fara yfir nokkra leikara (og líka leikstjóra) sem hafa gert tónlist á eftirminnilegan hátt, hvort sem það er á góðan, slæman eða bara stórundarlegan. Hér verður þó aðallega lögð áhersla á tónlist sem var ekki sérstaklega gerð fyrir kvikmyndir þó við gerum samt eina eða tvær undantekningar á því en hugmyndin er frekar að líta á hvernig þessir listamenn fúnkera sem tónlistarmenn ótengt kvikmyndunum þeirra.

Eddie Murphy

 

Byrjum á sjálfum Eddie Murphy. Á hátindi ferils síns um miðjan níunda áratuginn fékk hann þá grillu í hausinn að hann gæti verið poppstjarna líka og gaf út fleiri en eina plötu með frumsömdum lögum. Eitt þeirra varð hittari og lifir enn ágætlega. Þetta er ótrúlega hressandi og skemmtilega hallærislegt lag, og afar grípandi, sem svínvirkar að spila í partíum. Einnig gerði hann t.d. þetta bráðfyndna lag um búgí í botninum.

 

David Hasselhoff

 

Það er ekki hægt að gera svona lista nema hafa smá Hasselhoff. Maðurinn var poppstjarna í Þýskalandi en í flestum öðrum löndum er tónlist hans brandari (og jafnvel orðin það í Þýskalandi í dag). Þetta er eitt af hans kjánalegri lögum og á því vel heima hér á þessum lista.

 

Charlotte Gainsbourg

 

Og nú skiptum við aðeins um gír. Úr körlum yfir í konu og úr gríni í raunverulega góða tónlist, en þó aðallega geggjað myndband! Charlotte Gainsbourg er dóttir hins goðsagnakennda tónlistarmanns Serge Gainsbourg og í raun alveg jafn mikill tónlistarmaður og leikkona en hún er mun þekktari í dag fyrir leiklistina og sleppur því rétt svo inn á þennan lista. Í þessu lagi syngur hún með sjálfum Beck og myndbandið er einhvers konar grilluð háðsádeila á Bandarískt samfélag.

 

John Carpenter

 

Og aftur skiptum við um gír, úr leikurum yfir í leikstjóra. Költ leikstjórinn John Carpenter er ekki síður þekktur fyrir þá frábæru tónlist sem hann hefur gert fyrir flestar myndirnar sínar en færri vita þó að hann var á tímabili í hljómsveit sem kallaði sig The Coupe De Villes, en þeir tóku sig til og sömdu titillagið fyrir Big Trouble in Little China og sjálfur Carpenter syngur! Lagið og myndband gætu varla verið meira 80s, sem þarf ekki að vera svo slæmt!

 

David Lynch

 

Yfir í annan leikstjóra. Á sjötugsaldri tók David Lynch sig til og gaf út fyrstu plötuna sína, sem nefndist Crazy Clown Time. Hann gerði síðan aðra plötu og hefur sýnt að hann er alls ekki slæmur tónlistarmaður, og um leið má oft greinilega heyra í lögunum að þarna er á ferðinni sýruhausinn sem gerði myndir eins og Eraserhead og Mulholland Drive. Þetta er lag er mögulega það súrasta af mörgum súrum og myndbandið ekki síður.

 

Crispin Glover

 

Úr súru yfir í súrara. Crispin Glover er annálaður furðufugl en hann toppaði sig líklega með þessu kexruglaða lagi. Það er erfitt að lýsa því með orðum og myndbandið er í sama dúr, skemmtilegur „Carnival Freakshow“ fílíngur í þessu. Flestir munu skiljanlega varla meika þetta lag en fyrir unnendur góðrar sýru, eins og undirritaðan, þá er þetta bara ansi hressandi!

 

Corey Feldman

 

Corey Feldman er gott dæmi um leikara sem hefði betur látið það ógert að reyna að vera tónlistarmaður. Feldman var frábær leikari sem barn en það að vera barnastjarna getur tekið sinn toll og Corey fór ekki vel út úr því. Þetta lag sýnir það vel enda virðist hann halda að hann sé næsti Michael Jackson þarna.

 

Leonard Nimoy

 

Nimoy gerði þessa krúttlegu ballöðu um sjálfan Bilbo Baggins á sjöunda áratugnum og það er ekki hægt að mislíka þetta lag. Það er bara of krúttlegt. Myndbandið er afskaplega mikið barn síns tíma og líka afskapalega krúttlegt. Mússímúss!

 

Zooey Deschanel (Me and Him)

 

Zooey er ekki bara góð leikkona og ógeðslega sæt heldur kann hún líka að syngja og hefur gert nokkrar plötur með hljómsveit sinni Me and Him. Þetta lag er ansi hresst.

 

Christopher Lee

 

Christopher Lee byrjaði að syngja metal tónlist á níræðisaldri. Gerist ekki svalara. Þetta lag er samt þannig séð frekar vont, en rödd Lee heitins gefur því samt nokkur kúlstig.

 

William Shatner

 

William Shatner syngur alveg eins og hann leikur…en á góðan hátt! Hér er annað gott dæmi.

 

Steven Seagal

https://www.youtube.com/watch?v=zDveWYXUCU0

 

Jább, Steven Seagal hefur gefið út tónlist. Kántrítónlist. Og hann er meiraðsegja ekki alslæmur söngvari og kann að spila á gítar. En því miður er tónlistin hvorki sérlega nóg né heldur sérlega slæm, og því er lítið gaman að henni. Hún er bara algjört miðjumoð. En samt… þetta er Steven Seagal…að syngja kántrí! Bara hugmyndin ein er hilaríus. Ekki skaðar að hann gerði plötu sem heitir “Songs From the Crystal Cave”. Lagið sem fylgir hér er semi-valið af handahófi en það er 12 mínútna langt og í myndbandinu getur maður séð Seagalinn syngja og spila, ef þið trúið því ekki ennþá að þetta sé hann.

 

Edda Heiðrún Backman

 

Endum þetta síðan á einu íslensku, þetta lag var reyndar samið fyrir kvikmyndina Eins og skepnan deyr og meiraðsegja af sjálfum leikstjóranum Hilmari Oddssyni. En fyrst það er til dæmi um íslenska leikkonu sem söng vinsælt dægurlag þá var ekki annað hægt en hafa það á þessum lista. Þetta er líka flott lag og Edda syngur það mjög vel.

Ef þið lumið á fleiri skemmtilegum dæmum um lög eftir leikara eða leikstjóra þá endilega skellið inn hlekkjum í athugasemdunum!