Það er heldur betur nóg að gera hjá okkar manni, Ólafi Darra Ólafssyni. Í fyrra deildi kappinn skjánum með mönnum á borð við Matthew McConaughey og Liam Neeson, og nú í bíó má sjá hann við hlið Vin Diesel í The Last With Hunter. Á næsta ári megum við svo eiga von á honum í komandi stórmynd Spielbergs, The BFG (Big Friendly Giant), en nýjar heimildir leiða það í ljós að hann skjóti upp kollinum með Ben Stiller og vinum í Zoolander 2.

Á opinberri heimasíðu myndarinnar The Last Witch Hunter má finna ýtarlega lýsingu á tilkomumiklum prófíl leikarans og verkefnum, innlendum sem erlendum. Þar kemur einnig fram að Ólafur er væntanlegur í glænýrri gamanþáttaseríu frá Netflix sem kallast Lady Dynamite, með Mariu Bamforde í aðalhlutverki og frá engum öðrum en Mitch Hurwitz, manninum á bakvið Arrested Development þættina ómetanlegu.

12233247_10153681719049424_614684813_n

Zoolander 2 kláraði tökur síðastliðið sumar og verður frumsýnd í febrúar á næsta ári. Hlökkum til að sjá hvað hlutverk Darra mun fela í sér þar. Smelltu hér til að sjá kitlu og kynningarplakötin fyrir „2oolander“.