valerian_teaser-720x1067-1Luc Besson hefur ekki verið upp á sitt besta í leikstjórasætinu í áraraðir, umdeilanlega frá því að The Fifth Element kom út (þó Lucy eigi sér ýmsa litla verjendur, undirritaður er þar á meðal), en á næsta ári má búast við dýrustu „indí“-mynd allra tíma frá kappanum, með ofurlanga titilinn Valerian and the City of a Thousand Planets.

Myndin er byggð á hundgamalli franskri myndasöguseríu eftir Jean-Claude Mézières, seríu sem m.a. George Lucas sótti mikinn innblástur í þegar hann lét vaða í Star Wars á sínum tíma. Besson er mikill aðdáandi þessara sagna og hefur ekki farið leynt með það að þessi metnaðarfulla geimópera er búin að vera draumamyndin hans síðan hann var krakki.

Í júlí á næsta ári fáum við að sjá hvernig afraksturinn heppnast en í millitíðinni er margt til að dást að í fyrsta tísernum, þar sem alveg er ljóst að engu hefur verið tilsparað við gerð myndarinnar. Til gamans má einnig geta að virtu brellufyrirtækin ILM og Weta unnu bæði að verkefninu, sem verður að teljast nokkuð merkilegt – og sjaldgæft.

Með helstu hlutverkin fara Dane DeHaan, Cara Delevingne, Clive Owen, Rihanna, John Goodman og Ethan Hawke.

Hér er smjörþefurinn af pixladýrð þessarar (vonandi) klikkuðu sci-fi ævintýramyndar.