Kvikmyndahátíðin Stockfish Film Festival in Reykjavík var haldin í fyrsta skipti í upphafi þessa árs í Bíó Paradís, en þar var á ferðinni eins konar endurvakning á hinni gömlu Reykjavík Film Festival sem var haldin reglulega frá 1978 til 2001. Hátíðin gekk framar vonum og allir sem mættu voru ánægðir með framtakið og því var auðvitað haldið áfram með planið hafa þetta að árlegri hátíð. Næsta Stockfish hátíð verður haldin dagana 18-28 febrúar og nú hafa aðstandendur hátíðarinnar tilkynnt sex fyrstu titlana sem verða á hátíðinni auk eins af gestunum sem munu mæta.

Á vefsíðu hátíðarinnar stendur:

“Það gleður okkur að tilkynna fyrstu sex myndirnar sem sýndar verða á hátíðinni í febrúar. Meðal gesta verður Golden Globe verðlaunahafinn og tónskáldið Jóhann Jóhannsson, sem var einnig nýverið tilnefndur til Grammyverðlauna fyrir tónlist sína í Theory of Everything (2015), en hann mun fylgja eftir framúrstefnulegri stuttmynd sinni End of Summer (2014) á hátíðinni. Listræni stjórnandinn og leikmyndahönnuðurinn László Rajk mun einnig koma og kynna myndina Son of Saul (2015) en hún fjallar um fanga í útrýmingarbúðum nasista. Þess má geta að Rajk var einnig þekktur fyrir að vera listrænn stjórnandi á setti stórmyndarinnar The Martian (2015).”

Myndirnar sex sem tilkynntar voru eru:

Son of Saul/ Sonur Sáls

SonOfSaul-W

“SONUR SÁLS hverfist um ungverskan fanga í útrýmingarbúðum nasista sem tilheyrir Sonderkommandos, hópi gyðinga sem neyddir voru til að aðstoða við útrýmingu og líkbrennslu samfanga sinna. Nýstárleg og óvægin sýn á helförina sem hlaut hin virtu Grand Prix verðlaun á Cannes hátíðinni.”

 

The Look of Silence /Augnaráð þagnarinnar

TLOS_ADI_MOTHER

“AUGNARÁÐ ÞAGNARINNAR fylgir eftir einni mögnuðustu heimildarmynd 21. aldarinnar, ATHÖFNIN AÐ AFLÍFA (e. THE ACT OF KILLING). Hér beinir leikstjóri fyrri myndarinnar, Joshua Oppenheimer, sjónum sínum að öldruðum sjóntækjafræðingi í Indónesíu og uppgjöri hans við málaliðana sem myrtu bróður hans í skipulagðri útrýmingu stjórnvalda á meintum kommúnistum.”

 

Victoria

maxresdefault

“Victoria er stödd á næturklúbbi í Berlín þegar hún hittir hún fjóra menn sem bjóða henni með sér í kynnisferð um hina „raunverulegu“ Berlín. Áður en hún veit af er hún flækt í vef glæpa og á flótta undan lögreglunni. Einstakar borgarsenur og spennandi framvinda prýða þessa mynd sem tekin er upp í einni samfelldri töku en þessi óvenjulega myndataka tryggði myndinni Silfurbjörnin fyrir sérstakt listfengi á Berlinale.”

 

Cemetery of Splendor/Ást í Kohn Kaen

untitled

“Fáir leikstjórar utan David Lynch sýna jafn mikla leikni og næmni þegar kemur að túlkun á tungumáli drauma og Apichatpong Weerasethakul“ segir gagnrýnandi Variety. ÁST Í KHON KAEN fjallar um Jenjiru, konu sem annast hermenn sem þjást af dularfullri svefnsýki og tilraunir hennar til að ráða í undarlega drauma þeirra. Myndin var sýnd í Un Certain Regard flokknum á Cannes hátíðinni.”

 

Nahid

6526c716-dec8-4ec1-b9d5-81a9c808016d

“Nahid heldur forræði yfir syni sínum eftir skilnað við manninn sinn, gegn því skilyrði að hún giftist aldrei aftur. Þegar hana langar að stofna heimili með nýja kærastanum sínum rannsakar Nahid hvort hún geti komist hjá skilyrðinu gegnum gloppur í flóknum skilnaðarlögum Íran. Þegar hún finnur hjáleið er óljóst hvort hún reynist bölvun eða blessun. Sýnd í Un Certain Regard á Cannes hátíðinni.”

 

End of Summer/Sumarlok

“SUMARLOK er tilraunakennd stuttmynd eftir tónskáldið og Golden Globe verðlaunahafann Jóhann Jóhannson. Áhorfandinn fer í dáleiðandi og lágstemmdan könnunarleiðangur um berangurslegt landslag eyjunnar Suður Georgíu og Suðurskautlandsins undir sumarlok þegar dagarnir styttast óðum. Myndin byggir á heimspekikenningu þar sem gamlar hugmyndir um náttúruna sem viðfang fegurðar og forréttinda fyrir mannskepnuna eru véfengd. Hún er skotin á svarthvíta súper 8 filmu og undir hljómar seiðmögnuð tónlist eftir Jóhann.”

Við getum ekki annað sagt en þessi fyrsti listi af myndum líti bara ansi vel út og erum því ansi spennt fyrir næstu Stockfish hátíð þar sem ætti að vera af nógu að taka fyrir íslenska kvikmyndaunnendur.

Allar nánari upplýsingar er að finna á vefsíðu hátíðarinnar.